Club de Montaña “O Carroucho”

« Voltar

Allariz

Podes consultar o tríptico da ruta.
Necesitas ter instalado o Adobe Reader®. 		(1.433 Kb)
SITUACIÓN XEOGRÁFICA: Concellos de Allariz e Ourense
DATA DA ACTIVIDADE: sábado, 17 de abril de 2010
PREPARADA POR: Alex
PREZO DA ACTIVIDADE: 10€ para os socios e 15€ para os non socios. Inclúe desprazamento en autobús e seguro de transporte
DATA TOPE PARA APUNTARSE: xoves, 15 de abril de 2010, antes das 15 horas
COMO CHEGAR: Colleremos a AP-9 dirección Santiago, onde tomaremos a saída 72 para incorporarnos á AP-53 dirección Ourense, na que tomaremos a saída da A-52 e despois a saída á N-525 que nos levará ata a Vila de Allariz onde comezará o noso percorrido.

DATOS TÉCNICOS:

TIPO DE SENDA: Pistas, camiños e sendeiros
DIFICULTADE: Baixa — Baixa-Media — Media — Media-Alta — Alta
DURACIÓN: 5 horas
DISTANCIA LINEAL: 19 Km.
INTERESE DA RUTA: Paisaxística
RECOMENDACIÓNS: Levar botas e calzado de recambio porque ultimamente vemos que non para de chover. É tamén recomendable levar polainas dado que nalgúns sendeiros encontraremos algo de auga e lama tendo en conta as abundantes chuvias caídas nas últimas semanas. Levar toalla, bañador e chancletas porque se imos con tempo ao final da ruta visitaremos unhas termas en Ourense para gozar dun reparador baño nas súas quentes augas.
BREVE DESCRICIÓN: A vila de Allariz é coñecida por ter unha ruta de 50 km. das máis antigas de Galicia e como homenaxe a ela faremos unha circular saíndo da mesma vila de Allariz que rodearemos pouco a pouco e poderemos ir vendo desde distintos puntos e distintas alturas. A subida, ata chegar a uns 800 m. de altitude, é suave e fácil de camiñar. Iremos atravesando as fragas que rodean a vila, sen ver rastro de piñeiros ou eucaliptos, só bosques autóctonos nos que predominan as carballeiras e antigas vereas marcadas por antigos muros de pedra tapizados por musgos de distintas tonalidades. Tamén atoparemos camiños ás veces asfaltados por pedras de posibles antigas calzadas romanas.
Poderemos gozar de aire fresco, limpo e húmido durante todo o percorrido, acompañado só polo son do canto dos paxaros e a música do vento entre as árbores. Despois de chegar ao alto a baixada nos levará por pequenos e tranquilos pobos a distintas alturas nos que podemos ollar algunha construción autóctona galega. O último tramo será descendendo polo costado oposto ata chegar á beira do río Arnoia que percorremos durante uns 5 km. gozando das súas ben respectadas beiras e nas que predominan os ameneiros xurdindo incluso do mesmo centro do río.
OUTROS DATOS: Pararemos a almorzar e mercar o necesario en Allariz.
« Voltar